- Tíðindi, mentan og ítróttur
Góðan morgun Føroyar
"Er tað nakar sum saknar onkran, at halda jól saman við - onkur støk kvinna ella stakur maður ella ein mamma ella pápi við børnum?
Vinaliga skriva til mín, um tit hava hug at eta ein jóladøgurða saman við okkum trimum - mær og synum mínum sum eru 10 og 11"
Soleiðis skrivaði Beinta Henriksen úr Sørvági á Facebook fyri fáum døgum síðani.
Hon vil fegin hava gestir jólaaftan. Gestir, sum annars høvdu siti einsamallir tann 24. desember.
- Eg fekk hetta hugskotið, tí nú verða vit ikki so nógv á jólum, og eg hugsi, at tað kanska eru onnur sum vit, ið kundu hugsað sær at verið fleiri jólaaftan. Tað er eisini stuttligt hjá børnum at vera fleiri jólaaftan, sigur Beinta Henriksen.
Synum hennara, sum eru 10 og 11 ára gamlir, dámar væl hugskotið:
- Eg spurdi teir, áðrenn eg skrivaði hetta á Facebook, og teir eru við upp á tað. Teir halda at tað er stuttligt og spennandi, fortelur Beinta Henriksen.
Enn hevur eingin vent sær til hennara fyri at halda jól saman við henni og dreingjunum. Men tað er kanska ikki so løgið, heldur Beinta Henriksen:
- Mann hoyrir um so nógv, ið sita einsamøll á jólum, men eg trúgvi at tað er tabu at tosa um. Tí hopi eg at onkur setur seg í samband við okkum, sigur Beinta Henriksen.