Tað eru ivaleyst fleiri, sum í dag og kanska næstu vikurnar eisini fara at vera eitt sindur eym í kroppinum. Tí tað er januar, vit hava livað væl í desember við nógvum mati og hava ivaleyst ikki hugsað so nógv um at vera sunn.

Tí er tað nú, at nógv fólk vilja røra seg og venja - millum annað við at renna.

- Fyrst og fremst renni eg fyri at føla ta vælveruna, sum renningin gevur. Og so finni eg ofta fram til loydnir upp á ymiskar trupulleikar, tá eg havi runnið.

Tað sigur Christian Nagata, sum seinastu mongu árini hevur runnið eini tvær ella tríggjar ferðir um vikuna.

Eisini Kitty May Ellefsen hevur renning sum ein nattúrligan part av gerandisdegnum.

- Eg blívi altíð glað, tá eg havi verið og runnið ein túr. Eisini hóast tað er regn og kalt. Renningin gevur mær orku og yvirskot, sigur Kitty May Ellefsen.

Í morgunsendingini fortaldu tey bæði frá sínum royndum við renning og góvu góð ráð til tey, ið júst eru byrjað at renna.