- Tíðindi, mentan og ítróttur
Góðan morgun Føroyar
Tá danska Melodi Grand Prix kappingin verður tann 10. februar, fara tríggjar føroyskar kvinnur á pallin.
Tað eru Carlsen-systrarnar Vanja, Laila og Barbara, sum skulu luttaka í stóru donsku sangkappingini við sanginum "Standing up for love".
- Vit eru uppvaksnar við Melodi Grand Prix, og minnast serliga væl teir ymsu luttakararnar frá tí vit vóru yngri, og vit sótu heima í stovuni øll familjan og hugdu, sigur Laila Carlsen.
Enn er ikki greitt, júst hvussu framførslan fer at vera tann 10. februar, tá kappingin er.
- Næstu tíðina skulu vit sjálvandi venja sangin og eisini tosa við fólkini handan grand prixið um eitt nú hár, klæðir og sminku, siga systrarnar.
Sambært umboðsmanni teirra, Henrik Sørensen, sum hevur arbeitt við danska grand prixnum í meir enn 30 ár, hava Laila, Vanja og Barbara góðar møguleikar at kunna umboða Danmark í altjóða sangkappingini, sum verður í mai.
- Fyrst og fremst syngja tær ein sang, sum veruliga fangar og svingar væl. Harafturat syngja tær fantastiska væl, síggja gott út og eru dámligar í allar mátar, sigur Henrik Sørensen.
Melodi Grand Prix verður tann 10. februar og kann síggjast beinleiðis í KVF.