Sunnudagin ber til at síggja Øssur Debes Eiriksfoss á amerikansku sjónvarpsrásini NBC, har hann kappast í eini heilt serligari útgávu av American Ninja Warrior.

Tað var í 2016, at føroyski ítróttarmaðurin var at síggja á føroyska liðnum Team Søpapagøjerne í Danmarks Ninja Warrior. Føroyska liðið kláraði seg so mikið væl, at tey vunnu ta kappingina.

- Stutt aftan á setti framleiðarin av American Ninja Warrior seg í samband við meg og spurdi, um eg vildi koma yvir til Las Vegas og vera við á Team Europe, fortelur Øssur Debes Eiriksfoss.

Í summar var hann so í Las Vegas og luttók í American Ninja Warrior.

Av tí at sendingin ikki verður víst fyrr enn sunnudagin, kann Øssur Debes Eiriksfoss ikki siga nakað um, hvussu tað gekst sær í kappingini, men hann sigur, at amerikansku framleiðararnir vóru rættiliga áhugaðir í føroysku luttøkuni.

- Eitt amerikanskt filmslið var í Føroyum í summar, og tey gjørdu upptøkur millum annað við Gjógv, í Kirkjubø og í Gásadali, sigur Øssur Debes Eiriksfoss.