- Tíðindi, mentan og ítróttur
Góðan morgun Føroyar
Mær dámar væl avbjóðingar sigur Uni Rasmussen, sum, hóast hann er blindur, er fúsur at súkkla til París.
Saman við Mariu Svabo Hansen og Henrik Kølleskov fer hann at súkkla teir mongu kilometrarnar á tandemsúkklu.
Maria og Henrik skiftast um at sita framman og stýra. Uni situr aftanfyri.
Longsti túrurin higartil hevur verið úr Havn til Eiðis og aftur. Tilsamans 108 kilometrar.
Eftir ein tílíkan túr ert tú troyttur og hevur ilt í afturpartinum, sigur Uni brosandi.
At vera partur av Rynkeby er nakað heilt serstakt, eru bæði samd um.
Samanhaldið er framúr, og avbjóðingin er ógvuliga spennandi.
Tað er ein fyrimunur, at vit kennast væl, tí at súkkla á tandem snýr seg um samstarv, sigur Maria Svabo Hansen.
Síðst í juni byrjar langa ferðin til París.
Team Rynkeby er eitt altjóða vælgerandi súkklulið, sum á hvørjum ári súkklar til París fyri at savna inn pening til børn við lívshættisligum sjúkum og familjur teirra.
Í 2018 er liðið samansett av 1.900 súkklarum og 450 hjálparum, deild út á 44 lokal lið í Føroyum, Danmark, Svøríki, Finnlandi, Íslandi og Noreg.