- Tíðindi, mentan og ítróttur
Góðan morgun Føroyar
- Hann er fittur, stuttligur, tvørur, strævin, men einki einki ilt býr í honum. Hann er eitt tað besta menniskja á jørð.
Soleiðis lýsir Elin Vatnhamar Olsen 32 ára gamla beiggja sín, Magnus, sum hevur Down´s syndrom.
Sum vit sóu í sendingini "Tey serligu børnini" er tað nakað serligt at fáa eitt barn við Down´s, men hvussu er at vera systkin hjá einum, ið hevur Down´s?
Sambært Elini Vatnhamar Olsen hava hon og hini bæði systkini ikki merkt stórvegis til, at beiggin er øðrvísi enn flest onnur.
- Tað hava verið støður, har eg bleiv varug við, at hann ikki var sum hini. Til dømis legði eg til merkis, at hann sang øðrvísi enn hini, tá vit vóru til kór. Fóru vit í BR, hugdu børnini nógv eftir honum og so framvegis. Serliga børn hugdu, tí hann sá jú øðrvísi út, sjálvt um eg ikki dugdi ordiliga at síggja tað, sigur Elin
Vatnhamar Olsen.
- Vit hava altíð fylgst. Í skúlanum, til skótar og til kór og so framvegis. Ótilvitað havi eg sikkurt verið ein systur, sum hevur vart hann eitt sindur. Sjálvandi hava tað verið støður, har eitt nú lærarin bað meg hjálpa við at fáa hann upp úr svimjihylinum ella okkurt líknandi, men eg hugsaði ikki nakað keðiligt um tað,
sigur Elin Vatnhamar Olsen.
Sambært henni hevur beiggin altíð fingið nógv uppmerksemi.
- Tá mann er so fittur og gott fólk, sum han er, so slepst ikki undan, at hann hevur fingið uppmerksemi. Tað hevur tó ikki merkt, at vit systkini ikki hava fingið uppmerksemi orsakað av honum, fortelur Elin Vatnhamar Olsen.
Í morgunsendingini fortaldi hon, hvussu tað er at vera systkin hjá einum, sum hevur Down´s syndrom.