- Tíðindi, mentan og ítróttur
Góðan morgun Føroyar
2. jóladag sat Atli Gregesen við telefonini og leitaði á netinum.
Á síðuni hjá Daily Mail sá hann eina samrøðu við Juan Mata um verkætlanina, Common Goal.
Endamálið er at fáa kendar fótbóltsspælarar at lata eitt prosent av síni løn til vælgerandi endamál.
Atli Gregersen hugsaði alt fyri eitt, at hetta var eitt frálíkt átak.
Hann sendi teimum ein meyl, og segði frá, at hann kundi hugsað sær at verið við.
Seinni varð hann ringdur upp, og tað endað við, at hann varð bjóðaður uppí.
Hóast Atli Gregersen viðgongur, at tað er stórur munur á hansara lønarseðli, og honum, sum Juan Mata fær, so vildu teir fegin hava føroyingin við.
Grundleggjandi snýr tað seg meira um at byrja eitt rák heldur enn einstøku upphæddina.
Nú letur føroyski landsliðsskiparin eitt prosent av síni fótbóltsløn til Common Goal, men sum frálíður kundi hann hugsað sær, at okkurt var gjørt í Føroyum.
Atli Gregersen ivast ikki í, at aðrir fótbóltsspælarar eisini eru hugaðir at lata nakrar krónu, og tilsamans kann tað gera mun.
Fótbólturin hevur givið mær so nógv, og nú vil eg fegin geva okkurt aftur, sigur Atli Gregersen at enda.