Sunnudagin fara yvir 600 rennarar at luttaka í Atlantic Airways Tórshavn Maraton.

Hetta er 16. ferð, at renningin er á skránni, og luttakaratalið hevur øll árini verið støðugt vaksandi.

Og ikki bert føroyingar luttaka í árligu renningini.

- Vit hava rennarar úr umleið 28 ymiskum londum, og tað tykist, sum at áhugin hjá útlendingum at luttaka í maraton í Føroyum gerst bara strri og størri fyri hvørt ár, sigur Herluf Jacobsen frá rennifelagnum Bragdið.

Í løtuni ber til hjá tilsamans 750 rennarum at vera við.

- Vit hava sett hetta markið, soleiðis at vit eisini sjálvi kunnu fylgja við og veita rennarunum ta tænastuna, sum teir vænta til eitt slíkt tiltak. Hóast áhugin er ógvuliga stórur, so velja vit at vaksa um tiltaki í smáum, sigur Ann Thomsen frá Bragdinum.

Tað er sunnudagin 3. juni at Tórshavn Maraton er, og av tí sama eru ávísir vegir stongdir sunnudagin seinnapart.