- Tíðindi, mentan og ítróttur
Góðan morgun Føroyar
Í farnu viku blivu 5,4 kilo av føroyskum hári send úr Føroyum til Danmarkar.
Har verður hárið brúkt til at gera parúkkar við. Parúkkar, sum eru ætlaðir fólkum, ið hava mist sítt egna hár í sambandi við sjúku.
- Hetta er tann størsta nøgdin av hári, vit nakrantíð hava samlað, sigur Fríðgerð Joensen.
Hon eigur og rekur hárfríðkanarstovuna Salong Fríðgerð. Seinastu fýra árini hevur hon fingið hár frá føroyingum, sum vilja hjálpa teimum, sum orsakað av sjúku, hava mist hárið.
- Tað eru børn, kvinnur og menn, sum vilja lata longu lokkarnar til eitt vælgerandi endamál. Fleiri hava tó í felag, at tey kenna onkran, sum hevur mist hárið av eitt nú krabbameinsviðgerð. Til dømis var tað ein drongur í Klaksvík, sum valdi at lata hár, tí mamma hansara hevði mist alt hárið, eftir at hon hevði verið í kemoviðgerð, fortelur Fríðgerð Joensen.
Í morgunsendingini fortaldi Fríðgerð Joensen um hugskotið at savna hár, sum síðani verður brúkt til parúkkar ætlaðum teimum, ið hava verið ella eru rakt av sjúku og hava mist alt hárið.