- Tað er stórur tørvur á eini skipan, sum hjálpir fólki, ið eru sjúk og hava tørv á sálarligari hjálp, likamligari venjing og sosialari viðgerð. Tað snýr seg um, at tá tú hevur verið sjúkur ella er traktur av langtíðarsjúku, so skalt tú klára teg aftur í gerandisdegnum.

Tað sigur fyrrverandis løgtings- og landsstýriskvinnan, Rósa Samuelsen.

Fyrrapartin í dag skipaði Sambandsflokkurin fyri almennum fundi, ið snúði seg um, hvussu vit í Føroyum kunnu skipa rehabilitering.

- Í Føroyum er eingin rehabiliteringsskipan, og tað merkir, at fólk við sjúku fáa ikki ta hjálpina, sum teimum tørvar. Og tað tekur hart upp á tey avvarðandi, sum í síðsta enda sjálvi kunnu gerast sjúk orsakað av umstøðunum tey liva undir, sigur Rósa Samuelsen.

Hóast sjúklingar hava eina endurvenjingarætlan, verða tey sjúku ikki loftað nóg væl:

- Endurvenjingarætlanin er ikki nóg breið. Hon tekur ikki hædd fyri allari heildarstøðuni hjá persóninum. Til dømis kanst tú hava eina ætlan, sum sigur, at tú hevur tørv á taluundirvísing, tí tú hevur mist førleikan at tosa. Tað stendur í ætlanini, at tú skalt hava tað, men tú hevur ikki krav upp á tað, tí vit hava ikki tilboðið, sigur Rósa Samuelsen.

Tá tað kemur til at samskipa vegna borgaran og avvarðandi, so er eingin samskipan, og tað er ein trupulleiki sambært Rósu Samuelsen, og hon vísir á, hvussu mann hevur loyst trupulleikan í Noregi:

- Í Norra hava tey sett í lóg, at tey fólkini, sum eru rakt av sjúku og avvarðandi fáa í boði ein samskipara, sum skal hava ábyrgdina av, at rehabiliteringsætlanin, altso heildin av menniskjanum, verður fylgd upp, sigur Rósa Samuelsen.

So leingi vit ikki hava eina lóg, sum tryggjar rættin hjá fólki, so kann mann ikki siga, at tað bjargar so ótrúliga nógvum, men tú kanst í øllum førum fáa staðfest, hvønn tørv tú hevur. tað er so eisini viðvirkandi til at trýsta á og seta tiltøk inn, hvat er tað, sum ein borgari skal hava, sigur Rósa Samuelsen.

Í morgunsendingini greiddi hon frá, hvussu ein rehabiliteringsætlan kann setast í verk og skipast.