- Eg kenni brádliga á mær, at Gud vil siga mær okkurt, og so fylgi eg hansara boðum. Eisini hóast eg eri eitt nú til ein almennan døgurða ella okkurt tílíkt.

Orðini eigur kommunulæknin og politikarin, Jenis av Rana.

Í nýggju bókini, Thi kendes for ret, skrivar hann um persónligar hendingar og upplivingar, ið allar hava tað í felag, at tað andaliga spælir ein týðandi leiklut.

Eitt nú lýsir Jenis av Rana í bókini ta náttina, tá krabbameinsrakta kona hasara fyri seks árum síðani bleiv grødd av Gudi á baðiverilsinum.

- Hon var so ómetaliga illa fyri, men knappliga kendi hon seg næstan fríska. Og líka síðani hasa náttina, hevur hon verið frísk, sigur Jenis av Rana, sum ikki ivast í, hvat tað var ,sum hendi:

- Vit eru sannførd um, at hon bleiv grødd av Gudi. Fólk høvdu biðið fyri henni, og eg trúgvi ikki uppá, at tað bara var av tilvild, at hon bleiv frísk hasa náttina, sigur Jenis av Rana.

Í morgunsendingini greiddi Jenis av Rana frá bókini og teimum minniligu, andaligu upplivingunum, hann hevur havt.