Hashtag.

Tað er heitið á nýggjari, føroyskari ungdómsrøð í Kringvarpinum, sum Maria Winther Olsen hevur gjørt.

Fyrsti partur av fýra verður at síggja í kvøld eftir Dag og viku, og hesaferð ber sendingin undirheitið ungdómslív.

- Í fyrsta partinum læra vit tey ungu at kenna. Talan er um fýra rættiliga ymiskar persónar, sum eg havi fylgt í juli og august mánaði í fjør, sigur Maria Winther Olsen.

- Eg var rættiliga nógv saman við teimum, og vit gjørdu tað soleiðis, at tey søgdu mær frá, tá tey skuldu eitthvørt, eitt nú til arbeiðis, at venja ella í onkra veitslu, sigur Maria Winther Olsen.

Tey fýra ungu fólkini, sum hon fylgir í sendingini, hevur hon sjálv valt út.

- Í eina tíð stalkaði eg fleiri persónum á Instagram, og tað er soleiðis, at eg kom fram til hesi fýra, sum vit síggja í Hashtag. Tey vóru eisini tey fyrstu fýra á mínum lista, og tíbetur søgdu tey beinavegin ja til at luttaka, greiðir Maria Winther Olsen frá.

Fyri hana hevur tað verið týdningarmikið, at gera sendingina soleiðis, at hon vendir sær til tey ungu.

- Hetta er ein sending um ung til ung. Men eg haldi, at onnur eisini kunnu fáa nakað burturúr, sigur Maria Winther Olsen.

Fyrsti partur verður vístur í sjónvarpinum í kvøld eftir Dag og viku. Eisini ber til at síggja fyrsta part á heimasíðuni kvf.fo.