- Tíðindi, mentan og ítróttur
Góðan morgun Føroyar
- Ein veldug og ógloymandi uppliving.
Soleiðis lýsir Hallur Hansen hendingina, tá dóttir hansara, Jóhanna, bleiv gift í Etiopia sunnudagin tann 27. januar. Umleið 20 føroyingar høvdu ferðast til Etiopia fyri at vera við til brúdleypið.
Hallur Hansen er javnan borðstjóri til ymsar veitslur og eisini brúdleyp, men hetta brúdleypið í Etiopia var nakað heilt serligt.
- Her í Føroyum eru vit von við, at borðhaldið er í fleiri tímar, men í Etiopia dansa tey størsta partin av veitsluni. Faktisk er tað soleiðis, at tey, sum sita niðri, eru hildin at vera sera keðilig, heldur Hallur Hansen skemtiliga fyri.
Eitt annað, sum eisini var annarleiðis við brúdleypinum í Etiopia, var, at so at siga ongar talur blivu hildnar.
- Tað brúka tey næstan ikki. Eg hevði so fyrireikað eina talu til dóttrina, og tað hildu tey vera heilt serligt, greiðir Hallur Hansen frá.
Brúdleypið taldi 300 gestir. Men í Etiopia er tað ikki nógv.
- Ein fortaldi mær har, at tað als ikki er óvanligt at hava brúdleyp fyri eini 1500 gestum, so hetta hildu tey vera eitt lítið brúdleyp, sigur Hallur Hansen.
Í morgunsendingini greiddi hann frá stóru upplivingini, tá føroyingarnir fóru í brúdleyp í Etiopia.