KÍ føroyameistari og evropeiskt met

KÍ kvinnurnar vunnu í dag sítt fjúrtanda FM-heitið á rað, og eru har við ájavnar metið hjá Skonto Riga

KÍ kvinnurnar eru FM-vinnarar fjúrtanda árið á rað (Mynd: Margit G. Joensen)

12.10.2013 - 18:25

Við 9-0 sigri á ÍF í Fuglafirði tryggjaði KÍ-kvinnurnar sær í dag sítt fjúrtanda FM-heitið á rað. Hetta FM-heitið er serstakt, tí tað hevur við sær, at KÍ-kvinnurnar eru komnar ájavnt met, sum menninir hjá Skonto Riga úr Letlandi eiga.

Skonto Riga vann fjúrtan meistaraheiti á rað frá 1991 til 2004, men nú hava KÍ-kvinnurnar gjørt tað sama. Tær hava verið FM-vinnarar síðani ár 2000.

KÍ-leikarin, Rannvá Andreasen, sigur við Kringvarpið, at tær vilja gera nógv fyri at eiga metið einsamallar: Tað er flott, at vit nú eisini eru komnar upp á fjúrtan á rað, men vit fara eisini eftir FM í 2014, tí so eiga vit metið einsamallar, sigur Rannvá Andreasen.

Rannvá skey tvey av málinum í 9-0 sigrinum á ÍF. Málini tóku hana upp á 448 mál í tilsamans 292 landskappingardystum.

Tað var tó Maria K. Thomsen sum gekk á odda við málskjótingini í dag. Maria skeyt fýra mál, øll í seinna hálvleiki. Maria er eisini toppskjútti hjá KÍ í ár við tilsamans 27 málum.

Hinir málskjúttarnir vóru: Eyðvør Klakkstein, Sigrid Jacobsen og Annika Petersen.

Endaliga støðan (faroesoccer.com):

1	KÍ	18	16	1	1	100	10	+90	49
2	EBS/Skála	18	15	0	3	62	14	+48	45
3	HB	18	12	1	5	66	24	+42	37
4	B36	18	9	2	7	28	26	+2	29
5	ÍF	18	4	0	14	17	83	-66	12
6	Víkingur	18	2	2	14	6	71	-65	8
7	AB	18	1	2	15	12	63	-51	5
8	B68/NSÍ	0	0	0	0	0	0	0	0