Lítil áhugi at leita eftir olju í Føroyum

Áhugin at leita eftir olju undir Føroyum er minkaður so nógv, at Vinnumálaráðið heldur tað vera neyðugt at seta tiltøk í verk at marknaðarføra.

Áhugin at leita eftir olju í føroyskum øki er ógvuliga lítil.

Johnsigurd Johannesen

Grækaris Djurhuus Magnussen

19.03.2014 - 09:03

Tingið fer í dag at viðgera eitt uppskot frá Johan Dahl, landsstýrismanni, um heimild at brúka pening, sum oljufelagið ENI rindaði til førleikamenning, at marknaðarføra føroyska landgrunnin.

Tá oljufelagið ENI gavst við sínum virksemi í Føroyum í 2011, stóð góð hálv onnur millión krónur, sum felagið rindaði til førleikamenning, framvegis á kontu á Gjaldstovuni, og ætlanin er at nýta hesa upphædd í trý ár til marknaðarføringina.

Sambært lógini um útbjóðingarumfar skulu feløg, sum leita eftir olju, veita fíggjarligan stuðul til tess at menna vinnuførleika í Føroyum. Í løtuni eru sjey leitiloyvi í gildi, men ógreitt er, um feløgini hava áhuga at leingja loyvini, sigur Vinnumálaráðið.

Jarðfeingi hevur gjørt eina ætlan um, hvussu føroyski landgrunnurin kann marknaðarførast. Hildið verður, at áhugin fyri føroyska økinum veksur aftur, tí enn er tað lutfalsliga lítið kannað.