Súkklari deyður í ferðsluvanlukku

<p>Ein 59 ára gamal maður á súkklu doyði seinnapartin, tá hann kom fyri ein bil í Kollafjarðartunlinum, sigur vakthavandi á politistøðini í Havn, sum fekk fráboðanina klokkan 14:47.</p>

<p>Maðurin kom súkklandi í tunlinum, tá hann av higartil ókendum orsøkum kom fyri ein bil, ið koyrdi suður eftir. Enn veit løgreglan ikki nágreiniliga, hví ferðsluvanlukkan hendi.</p>

<p>Løgreglan er í løtuni í gongd við at avhoyra bilføraran, ið koyrdi bilin, sum koyrdi á mannin á súkkluni, so greiða kann fáast á orsøkina til ferðsluvanlukkuna, ið kravdi eitt lív seinnapartin.</p>

<p><strong>Bilførarin varnaðist ikki mannin á súkkluni</strong></p>

<p>- Tað, sum vit fyribils vita, er, at bilførarin sá ikki mannin á súkkluni, fyrr enn ov seint var, sigur vakthavandi á politistøðini í Havn, Kristina Christiansen.</p>

<p>Talan er ikki um ein av sonevndu Rynkeby-súkklarunum, ið hava verið at sæð á føroysku vegunum seinastu mánaðirnar, verður upplýst á politistøðini í Havn.</p>

<p>Tey avvarðandi hjá manninum, ið doyði í ferðsluvanlukkuni, eru kunnað um ferðsluvanlukkuna, sigur Kristina Christiansen, vakthavandi á politistøðini í Havn, við kvf.fo.</p>