Sýslumaður meldað Sea Shepherd til løgregluna

<p>- Sea Shepherd hevur tikið sýslumannin og grindaformenn av ræði. Tí havi eg nú meldað Sea Shepherd, sigur Karl Johansen, sýslumaður í Norðoyggjum í samrøðu við útvarpið.</p>

<p>Tað fer ikki ótalað aftur við borðinum, at fólk frá felagsskapinum Sea Shepherd róku eina grind, ið lá í Haraldssundi í gjár, til havs aftur. Sýslumaðurin í økinum tekur nú sakina í egnar hendur og hevur meldað felagsskapin.</p>

<p>Karl Johansen, sýslumaður í Norðoyggjum, hevur meldað Sea Shepherd, tí hann heldur, at felagsskapurin hevur brotið grindareglugerðina, har ásetingar um rakstur av grind eru lýstar.</p>

<p><strong>Sýslumaður: - Løgreglan fekk einki gjørt</strong></p>

<p>Sýslumaðurin í Norðoyggjum sigur, at løgreglan ikki fekk forðað felagsskapinum Sea Shepherd at reka grindina til havs, tí løgreglan ikki hevði bát til taks, tá fólk frá Sea Shepherd róku grindina út aftur.</p>

<p>- Teir (Sea Shepherd, red.) róku grindina norður ígjøgnum Haraldssund, og grindin gekk so mikið skjótt, at grindin eisini kavaði, sigur Karl Johansen við útvarpið.</p>

<p>Fólkini frá Sea Shepherd vóru í skjóttgangandi báti, meðan løgreglan ikki hevði bát tøkan í økinum. Tí var ikki so nógv at gera, sigur sýslumaðurin í Norðoyggjum.</p>