Biðja Útlendingastýrið útvísa Sea Sherpherd-fólkum

12.09.2014 - 10:08
AktueltSamfelag
Biðja Útlendingastýrið útvísa Sea Sherpherd-fólkum
Løgreglan metir, at 70-80 stuðulsfólk hjá Sea Shepherd eru eftir í Føroyum
 
 

Politiið í Føroyum hevur biðið danska Útlendingastýrið um at vísa seks fólkum, sum komu til Føroya fyri Sea Shepherd, av landinum og geva teimum forboð fyri at koma higar aftur.

Talan er um fólkini, sum mánadagin fingu 1.000 kr. í bót fyri at bróta kunngerðina um grind og politiviðtøkuna.

Í hvussu so er fýra teirra eru longu farin úr Føroyum, uttan at rinda bótina. Eingin av teimum dømdu hevur rindað bótina.

Útlendingastýrið avger, um Sea Shepherd-stuðlarnir skulu vísast av landinum og fáa innferðarforboð, og hvussu leingi, eitt slikt forboð varar.

Peter Thaysen, sjefpolitiinspektørur, sigur, at enn hava tey ikki frætt frá Útlendingastýrinum.

70-80 fólk eru eftir

Hann sigur, at í gjár vóru 98 Sea Shepherd fólk í Føroyum. Men nøkur fóru av landinum í gjárkvøldið, so hann metir, at nú eru 70-80 eftir her.

Tey, sum ikki eru úr Norðurlondum, noyðast at fara, tá tey hava verið her í tríggjar mánaðir, tí so leingi kunnu útlendingar vera í Føroyum sum ferðafólk.

Átta onnur stuðulsfólk hjá Sea Shepherd, sum eisini vórðu tikin á Sandi 30.august, skulu í Føroya rætt 25.september.  

Tey vóru í trimum bátum, sum politiið tók og hevur enn.

Politiið avger ikki fyrr enn dómur er fallin, um tað eisini fer at biðja Útlendingastýrið um at vísa teimum átta av landinum og geva teimum innferðarforboð. 

 

 

Nýggjastu sendingar í ÚV
Mánadag 18. februar
Norðurljóð 18.februar 2019
91366
Mánadag 18. februar
Góðan morgun Føroyar 140219
91339
Mánadag 18. februar
Morgunlestur mánadagur 18. februar 2019
90855
Nýggjastu sendingar í SV
Mánadag 18. februar
AdAdam & Eva (3:8)
91271
Mánadag 18. februar
Kotan til kærleika (5:8)
90505
Mánadag 18. februar
Petra skal eiga (1:8)
91267
Mánadag 18. februar
Superheilar - Peter Lund Madsen (3:3)
91264
Mánadag 18. februar
3-2
91375