Føroya rættur gav Sea Shepherd bátarnar aftur

Føroya rættur gav í dag Sea Shepherd bátarnar aftur, sum politiið tók í grindini heima á Sandi tann 30.august.

Hóast Sea Shepherd hevur kunngjørt, at tey koma aftur til Føroya næsta ár, og teir tríggir bátarnir sannlíkt verða brúktir aftur tá í herferðini Grindstop, heldur rætturin, at bátarnir verða ikki brúktir til vandamiklari kriminalitet enn teir eru brúktir til higartil í Føroyum.

Og tann brotsgerðin gav ikki meira enn 1.000 kr. í bót. 

Fingu bót

Tá so virðið á hvørjum báti er 350.000 kr. sambært deildini hjá Sea Shepherd í Fraklandi, sum eigur bátarnar, svarar tað á hátt ongan til, at felagsskapurin missir bátarnar. Har er ikki samsvar ímillum, sigur rætturin.

Tey átta fólkini, sum vóru í bátunum á Sandi, fingu 1.000 kr. hvørt í bót fyri at bróta grindakunngerðina og politiviðtøkuna. Tey skulu eisini gjalda sakarkostnaðin.

Upplýst varð í rættinum, at offshoreparturin, tað er virksemið á sjónum, í Føroyum í summar kostaði fronsku deildini hjá Sea Shepherd 400.000 evrur, tríggjar milliónir krónur. 

Politiið brúkti milliónir

Eisini varð upplýst, at politiið brúkti nógvar milliónir krónur, upphæddin er tveysiffrað, til tilbúgvingina, meðan Sea Shepherd var í Føroyum.    

Seinastu Sea Shepherd fólkini fóru úr Føroyum fyrst í oktober. Men Sea Shepherd hevur longu boðað frá, at tey koma aftur hendanvegin næsta summar.

Ákæruvaldið kann kæra úrskurðin hjá Føroya rætti um bátarnar hjá Sea Shepherd til Landsrættin.