Greenland Express nýtir Airbus á Føroya-rutuni

Vága floghavn og onnur í Føroyum hava spurt um møguleikarnar at fáa Greenland Express at flúgva til Føroya.

Tað sigur stjórin í Greenland Express, Gert Brask, við heimasíðuna Check-in.dk. 

Í summar fleyg Greenland Express millum Grønland, Danmark og Ísland, men í mars, tá flúgvingin verður tikin uppaftur, verður rutunetið víðkað til eisini at umfata Føroyar og Kanada.

Felagið hevur higartil nýtt flogfør av slagnum Fokker-100, men nú er ætlanin at nýta Airbus 319-flogfør, sum eru av sama slag sum tey, ið Atlantsflog nýtir. 

Sambært Check-in.dk fer Gert Brask í næstu viku at hyggja at tveimum Airbus-flogførum, sum ætlanin er at leiga. Eitt annað flogfelag skal flúgva rutuna fyri Greenland Express. Við Airbus-flogførum ber til at flúgva beinleiðis millum Grønland og Danmark.

Atlantsflog situr ikki hendur í favn

Jørgen Holme, stjjóri í Atlantsflogi, sigur við Kringvarpið, at hann kennir einki til ætlanina hjá Greenland Express at flúgva til Føroya. Hann hevur bert hoyrt um hana í miðlunum. 

Tí vil hann ikki gera viðmerkingar til tíðindini.

Men Jørgen Holme leggur aftrat, at fer Greenland Express at flúgva til Føroya, so fer Atlantsflog ikki at sita hendur í favn, og lata sum einki.