Nýggj lóg mátti gerast fyri bilplássið

Tá Dátueftirlitið gjørdi vart við, at Vága Floghavn ikki uttan nakra lógarheimild kann skráseta bilar, sum brúka bilplássið við flogvøllin, noyddist Vinnumálaráðið at gera eina lóg um tað.

Lógin er sera stutt, hon sigur bara, at P/F Vága Floghavn hevur rætt uttan viðurlag at fáa upplýsingar frá Akstovuni um brúkarar og ánarar av akførum við tí endamáli, at krevja inngjald fyri nýtslu av parkeringarøkinum hjá P/F Vága Floghavn. Uppskotið er til hoyringar í løtuni.

Vága Floghavn hevur gjørt eina skipan sum ta ið undirsjóvartunlarnir hava. Myndir verða tiknar av nummarplátuni á bilum, sum brúka bilplássið. Vága Floghavn fær síðani at vita frá Akstovuni, hvør eigur bilin, og so verður rokning send.

Skipanir samanknýttar í hálvt ár

Skipanin hjá Akstovuni og skipanin hjá Vága Floghavn hava verið samanknýttar síðan juni í fjør. Men Dátueftirlitið hevur staðfest, at sambært persónsupplýsingarlógini skal P/F Vága Floghavn hava heimild í lóg fyri at seta nýggju parkeringarskipanina í gildi, tí upplýsingar í henni verða samankoyrdar við upplýsingar hjá Akstovuni.

P/F Vága Floghavn væntaði í fjør at fáa 1,4 mió. kr. frá teimum, sum brúka bilplássið við flogvøllin.