Peningur takast av kontuni til serviðgerðir

Fíggjarnevndin fær einki fíggjarnevndarskjal frá Heilsumálaráðnum um pengar at rinda tað, sum Eystari landsrættur álegði ráðnum at gjalda fyri viðgerð í Danmark.

Fíggjarnevndarskjalið, 10,3 mió. kr., strandaði í einum øðrum aðalráði, í Fíggjarmálaráðnum, sum skal góðkenna øll fíggjarnevndarskjøl, áðrenn tey fara víðari í Fíggjarnevndina.

Karsten Hansen, landsstýrismaður í heilsumálum, sigur, at Fíggjarmálaráðið noktaði at senda Fíggjarnevndini umbønina um tær 10,3 milliónirnar.

Tað var ikki neyðugt at biðja um pengarnar, fekk Heilsumálaráðið at vita frá Fíggjarmálaráðnum.

Freist til seinna partin í næstu viku

Pengarnir skulu takast av kontuni serviðgerðir uttanlands. Karsten Hansen sigur, at tað noyðist hann so at gera, hóast hann veit, at tá verður ov lítið eftir á teirri kontuni í ár.

Heilsumálaráðið hevur freist til seinnapartin í næstu viku at rinda Region Hovedstaden pengarnar. Í dag ella í morgin fara tey í Heilsumálaráðnum at viðgera spurningin, um tey skulu søkja um at sleppa í Hægstarætt við málinum.

Bæði Føroya rættur og Eystari landsrættur dømdu landsstýrið at gjalda Region Hovedstaden fyri varðhaldsviðgerð á Sct. Hans sjúkrahúsinum.

Eitt nevningating í Føroya rætti dømdi ein filipinskan sjómann í varðhaldsviðgerð fyri at stinga skiparan á frálandsskipinum Tórsvík við knívi.