Spielberg ger film í Føroyum

Heimskendi filmsleikstjórin, Steven Spielberg, kemur til Føroya at gera film. Filmurin, sum skal takast upp her, er ein filmsútgáva av einari skaldsøgu hjá Roald Dahl, sum kallast The Big Friendly Giant, ið kom út í 1982.

Upptøkurnar í Føroyum verða gjørdar í ár, og filmurin verður verður sýndur næsta ár. Filmurin verður framleiddur av Disney, Amblin og Reliance í samstarvi við Walden Media.

Fleiri av teimum kendastu framleiðsufólkunum í Hollywood eru við í framleiðslutoyminum. Melissa Mathison, sum er kend fyri at skriva filmin E.T. hjá Spielberg, hevur skrivað handritið til nýggja filmin.

Landslagsmyndir

Í filmsframleiðsluni verða landslagsmyndirnar m.a. úr Føroyum samantvinnaðar við tað, ið kallaðast "Motion Capture Technology." Við øðrum orðum, so eru landslagsupptøkurnar settar saman við upptøkum, ið verða gjørdar í einum stórum studio.

Tað er Visit Faroe Islands, ið hevur samstarvað við fólkini hjá Spielberg um hesa verkætlan.

- Vit eru sum vera man sera spent uppá hendan møguleika, ið verður við til at seta Føroyar á heimskortið, sigur Guðrið Højgaard, stjóri á Visit Faroe Islands.