Krevur reiðaríið hjá Anitu eftir skjølum

Reiðaríið Seta, sum rekur garnaskipið Anitu, stevndi í heyst Løgmansskrivstovuni fyri Føroya Rætt, tí løgmaður tá fyribils tók øll rættindi frá skipinum, og skipið varð lagt frá 1. november í fjør 

Løgmaður staðfesti avgerðina í apríl, og avgjørdi, at Anita skuldi missa rættin til at fiska í føroyskum sjógvi til 31. august í 2016.

Reiðaríið Seta vil hava Føroya Rætt at ógilda hesa avgerðina, og vil eisini hava eitt endurgjald fyri mista inntøku.

Løgmansskrivstovan hevur fingið freist til 8. juni at einum rættarmálsriti frá Seta.

Krevur skjøl

Jógvan Páll Lassen er advokatur hjá Løgmansskrivstovuni. Hann hevur heitt á P/f Seta um at leggja øll skjøl fyri rættin, sum kunna lýsa ognar- og fíggjarviðurskiftini í felagnum.

Spurnartekin hava verið sett við, um Seta lýkur ásetingarnar í lógini um vinnuligan fiskiskap, sum siga, at føroyingar altíð skulu hava ræðisrættin í føroyskum reiðaríum. Spaniólir eiga og fíggja ein stóran part av virkseminum hjá P/f Seta.

Men fyri at sleppa at fiska í føroyskum sjógvi, er ein fyritreyt, at viðurskiftini um útlendska ognarpartin og ræðisrættin eru í lagi.

Tí hevur advokaturin hjá Løgmansskrivstovuni heitt á reiðaríið at leggja skjølini fram, sum vísa, hvussu ognarviðurskiftini í felagnum veruliga eru.

Eru hesi viðurskifti ikki í lagi, skuldi reiðaríið av fyrstan tíð ongantíð havt fingið nakað loyvi, vil Jógvan Páll Lassen, advokatur hjá Løgmansskrivstovuni, vera við.

Vilja ikki lata upplýsingar

Jógvan Páll Lassen sigur við Kringarpið, at Seta vil ikki lata rættinum upplýsingar um fíggjarligu viðurskiftini í felagnum, tí Seta heldur ikki, at hesi viðurskifti eru viðkomandi fyri kravið móti Løgmansskrivstovuni

Tað hevur ikki eydnast Kringvarpinum at fáa viðmerking frá advoktatinum hjá Seta.