12 systkin úr Rituvík eiga nú heimsmetið

Tey 12 børnini hjá Elsebeth og Magnusi Olsen í Rituvík, sum var ein kendur skipari tá í tíðini, eru nú elsti systkinaflokkur í heiminum. Tað hevur Guinness givið familjuni váttan um í dag.

Øll 12 eru á lívi og 27. august í fjør vóru tey tilsamans 1025 ár og 41 dagar gomul. Samanlagt eldast tey 12 ár um árið, so nú eru tey umleið 1035 ár tilsamans.

SÍ EISINI Video: Kom við í føðingardag hjá heimsins elstu systkjum

Tann elsti, Magnus Salomon, er føddur 30. oktober 1920 og er sostatt 94 ára gamal, og yngstur í stóra systkinaflokkinum er Arne Kartin, sum er føddur 30. juli 1938 og er 76 ár.

- Fyri mítt viðkomandi er einki broytt. Tað skal meira enn hetta til at fáa meg upp at flákra, tí vit hava einki gjørt fyri tað sjálvi, sigur Amy Tausen, sum er eitt av teimum 12 systkjunum úr Rituvík.

Átti einki pass áðrenn metið skuldi skrásetast

Amy Tausen sigur, at tað eru nakrir av eftirkomarunum, sum hava stríðst fyri hesum og fyri tey er hetta nógv stuttligari.

Hon sigur, at millum annað skuldu øll 12 systkini lata passið inn. Okkurt av systkjunum hevði ongantíð átt eitt pass.

Tað ger hesa serligu søgu ikki minni sermerkta, at pápin, Magnus í Rituvík, doyði longu í 1940, tá tann yngsti bara var tvey ára gamal. Tað gjørdi, at Elsebeth var einlig mamma við 12 børnum undir krígnum.

Tóku met frá italskum systkinaflokki

Sum skilst hava systkini úr Rituvík tikið metið frá einum italskum systkinaflokki. Tey 12 systkini úr Rituvík eru hesi:

● Magnus Salomon, f. 1920

● Vensil, f. 1921

● Sára Malena, f. 1923

● Marin Fredrikka, f. 1924

● Arnholt Sofus, f. 1925

● Carl Sivar, f. 1928

● Elly, f. 1930

● Jaspur, f. 1932

● Harry, f. 1933

● Mary Elina, f. 1934

● Amy, f. 1936

● Arne Kartin, f. 1938.