Næraberg steðgaður

Næraberg, sum er á veg til Grønlands at fiska makrel, skuldi til Íslands eftir 12 grønlendskum fiskimonnum.

Í fjør summar noktaðu íslendskir myndugleikar Nærabergi at bunkra í Reykjavík, hagar skipið kom við maskinskaða.

Eftir nakrar dagar tóku íslendsku myndugleikarnir tó avgerðina aftur eftir trýst bæði úr Íslandi og Føroyum.  

Orsøkin er trætan um makrelin. Ísland er ikki við í semjuni millum hini strandarlondini um makrelin.

Og Næraberg fiskaði av felagstovninum, sum Ísland eisini eigur, er íslendska sjónarmiðið.  

Føroyar og Ísland hava ongan sáttmála um at veita skipum tænastur í havnum, og tí fekk Næraberg í gjár boð um at venda, tá hann kom til 12 fjórðinga markið um Ísland.