Dýrt at bróta grindalógina

Tá Vinnunevndin hjá løgtinginum skrivaði álit um uppskotið um grindalóg, helt meirilutin í nevndini, at bótin fyri at bróta lógina eigur at vera í minsta lagi 25.000 kr., skal hon gera nakran mun.

Føroya rættur viðgjørdi málini hjá teimum fimm Sea Shepherd fólkunum allan dagin í gjár og nakað út á kvøldið. Ákærdu fólkini nokta seg sek í at hava órógvað grindadrápini og ikki at hava gjørt eftir boðunum frá myndugleikunum.

Krevja minst 100.000 frá felagsskapinum

Ákæruvaldið krevur eisini minst 100.000 kr. frá Sea Shepherd í Niðurlondum, tí leiðarin hjá Sea Shepherd á landi í Føroyum fekk innferðarloyvi, visum, gjøgnum ta deildina.

Rosie Kunneke, sum er leiðari hjá Sea Shepherd fólkunum, sum virka á landi í Føroyum, er úr Suðurafrika, og skal tí hava innferðarloyvi fyri at sleppa til Føroya.

Hini fýra fólkini, sum vóru í rættinum í gjár, eru úr ES londum. Dómur fellur í málinum fríggjadagin klokkan 15:00.