Javnaðarflokkurin verður størstur flokkur

06.08.2015 - 17:17
AktueltPolitikkur
Javnaðarflokkurin verður størstur flokkur
Javnaðarflokkurin ger eitt ordans hál í nýggjastu veljarakanningini, sum er tann fyrsta síðan løgmaður skrivaði út nýval.
 

Nýggja kanningin gevur andstøðuni greiðan meiriluta í løgtinginum. Javnaðarflokkurin fær 23 prosent av atkvøðunum, og við hesum hevði flokkurin verið størsti flokkur á tingi, um val var í dag. Flokkurin hevði fingið átta tinglimir.

Næststørstur er Tjóðveldi, sum fær 20,2 prosent av atkvøðunum og hetta gevur 7 tingfólk.

Sambandsflokkurin, sum á seinasta vali var størsti flokkur, fær í dag bara 19 prosent av atkvøðunum. Á seinasta vali fekk flokkurin 24,7 prosent av atkvøðunum, so hetta er ein rættiliga stór afturgongd.

Beint í hølunum er Fólkaflokkurin við 18,6 prosentum. Hetta er eisini minni enn seinasta val, tí tá fekk flokkurin 22,5 prosent av atkvøðunum.

Sambandsflokkurin og Fólkaflokkurin fáa seks tinglimir hvør í hesari veljarakanningini.

 

Framsókn stendur seg væl

Framsókn ger eitt rimmar val, skulu vit trúgva hesari kanningini. Flokkurin fær 11,6 prosent av atkvøðunum og tvífaldar tingmannatalið úr tveimum á seinasta vali upp í fýra.

Miðflokkurin gongur eitt sindur aftur. Hann fær 4,7 prosent, men varðveitir teir báðar tingsessirnar kortini.

Verri er hjá Nýggjum Sjálvstýri, sum missir sín einasta tinglim. Nýggja kanningin gevur flokkinum bara 2,9 prosent av atkvøðunum, og tað er ikki nóg mikið at sleppa inn um tinggátt.

 

Andstøðan vinnur

Veljarakanningin gevur altso andstøðuni rættiliga stóran meiriluta. Tilsamans fáa Javnaðarflokkurin, Tjóðveldi og Framsókn 19 tingsessir, meðan samgongan við Sambandsflokkinum, Fólkaflokkinum og Miðflokkinum fær 14 tinglimir.

Veljarakanningin varð gjørd týskvøldið og mikukvøldið í hesari vikuni. Tilsamans 1116 veljarar svaraðu. Av teimum, sum svaraðu, søgdu 12,9 prosent seg ikki hava tikið støðu til, hvønn flokk tey fara at velja.

 
Nýggjastu sendingar í ÚV
Hósdag 5. desember
Mono: Sangir í samljóði (2:4)
101864
Hósdag 5. desember
Marjun Berg er gestur í Dansivali (I-II)
101860
Hósdag 5. desember
Góðan morgun, Føroyar 5. desember 2019
101845
Nýggjastu sendingar í SV
Hósdag 5. desember
Sí sendingina: Ein dagur í Nuuk
101848
Týsdag 3. desember
Kveikur: Samherjaskjølini (2:2)
101784
Sunnudag 1. desember
Andakt við Marjuni í Kálvalíð
101682
Sunnudag 1. desember
Guðstænasta í Mariukirkjuni
101705
Fríggjadag 29. november
Hyggjuráðið
101668