Hava vónir um at ein lánsavtala fæst í lag

Samráðingar hava verið seinastu dagarnar, og í nátt eru partarnir komnir ásamt um stevnuna í griksku fíggjarlógini næstu árini.

Hallið á fíggjarlógini í ár verður mett til 0,25 prosent av bruttotjóðarúrtøkuni, men næstu árini skal avlop vera á fíggjarlógini, og í 2018 skal tað vera hálvt fjórða prosent, sigur ein grikskur embætismaður, sambært Reuters.

Grikkaland hevur vónir um, at ein avtala fæst í lag longu í dag, so grikska tingið fær stundir at viðgera avtaluna. Tí 20. august er freistin at gjalda avdrátt av einum láni, sum evropeiski miðbankin fyrr hevur latið.

Týskland krevur nýskipanartiltøk sett í verk

Sambært avtaluni kann Grikkaland fáa 86 milliardir evrur aftrat í láni, tað eru 645 milliardir kr. í okkara peningi. Tað skal tryggja, at landið ikki fer á húsagang.

Serstakliga Týskland hevur sett sum treyt fyri láninum, at grikska stjórnin setur víðfevnd nýskipanartiltøk í verk.

Ein talsmaður fyri týska fíggjarmálaráðið sigur, at lánsgjaldið eigur at verða lagað eftir, hvussu nógvar nýskipanir Grikkaland hevur sett í verk.