Færri og færri limir í fólkakirkjuni

Tað verður longri og longri millum tey - fólkini, sum hvønn sunnudag seta seg á beinkirnar í føroysku fólkakirkjuni, sambært tølum hjá Hagstovu Føroya.

Í øllum førum um hugt verður at talinum á fólki, sum eru limir í fólkakirkjuni í Føroyum. Seinastu 15 árini hevur gongdin bert verið ein veg.

Ymiskt frá prestagjaldi til prestagjald

Í 2000 vóru 84,3 prosent av øllum føroyingum limir í fólkakirkjuni. Nú er talið komið niður á 81,6 prosent. Sostatt er talan um eina minking uppá 2,7 prosent seinastu 15 árini, um hugt verður at miðaltølunum fyri alt landið.

Tað er tó munur á teimum ymisku prestagjøldunum í landinum. Størsta afturgongdin hevur verið í Sjóvar prestagjaldi. Har eru 4,5 prosent færri limir í fólkakirkjuni nú í mun til 2000.

Minsta afturgongdin seinastu 15 árini hevur hinvegin verið í prestagjaldinum í Nesi. Har var minkingin 1,5 prosent frá 2000 til ársbyrjanina í ár.

Tølini fortelja ikki alla søguna

Tølini siga tó einki um orsøkina til at færri limir eru í føroysku fólkakirkjuni. Tí ber ikki til at siga, um tað er tí at føroyingar tilvitað melda seg úr fólkakirkjuni, ella um orsøkin er ein onnur.

Um hugt verður at teimum einstøku prestagjøldunum, hevur fólkakirkjan best undirtøku í Vágum. Í Vága prestagjaldi eru 91,7 prosent av fólkinum limir í fólkakirkjuni.

Verri er tó statt í Norðoyggjum. Har eru til samanberingar "bert" 63,7 prosent av fólkunum limir í fólkakirkjuni, sambært nýggjastu tølunum hjá Hagstovu Føroya.