- Tíðindi, mentan og ítróttur
Seta og landsstýrið í rættin um Anitu
![](https://kvf.fo/sites/default/files/styles/grein-ovasta-mynd/public/140421_anita.jpg?itok=B9idXtOI)
Fríggjadagin 2. oktober verður fyrireikandi rættarfundur millum partafelagið Seta og Føroya Landsstýri.
Seta vil hava rættin at døma Føroya Landsstýri og Løgmansskrivstovuna at viðganga, at tað ikki var rætt av Kaj Leo Holm Johannesen, løgmanni, at taka fiskiloyvið og veiðiloyvið frá garnaskipinum Anitu fyri sløkum ári síðani.
Málið ímóti garnaskipinum Anitu byrjaði í februar í fjør, tá skipið misti ein mann, meðan teir royndu við gørnum vestan fyri Føroyar.
Tá kom undan kavi, at skipið hevði brotið lógina um vinnuligan fiskiskap, og í apríl í fjør mælti Vørn Fiskimálaráðnum til at taka veiði- og fiskilioyvið frá Anitu, til dómur var fallin í málinum.
Seinast í oktober í fjør gjørdi Kaj Leo Holm Johannesen, løgmaður, av, at taka øll veiði- og fiskiloyvi frá Anitu frá 1. november í fjør.
Góðtók ikki avgerðina
Pf. Seta góðtók ikki avgerðina, og boðaði frá at málið fór í rættin, og at reiðaríið fór at krevja endurgjald. Samstundis sendi felagið Løgtingsins Umboðsmanni eina kæru um avgerðina hjá løgmanni.
6. november í fjør stevndi Seta Landsstýrinum og Løgmansskrivstovuni.
Sakarkravið var, at Løgmansskrivstovan verður dømd at viðurkenna, at avgerðin um at taka veiði- og fiskiloyvini frá garnaskipinum Anitu er tikin av órøttum, og tí er hon ólóglig. Harafturat vildi reiðaríið hava endurgjald, sum fyribils var sett til 50.000 kr.
Skipari og reiðari dømdir
17. desember í fjør fall dómur í rættinum, og tá vórðu bæði skipari og reiðari dømdir at rinda bót fyri brot á lógina um vinnuligan fiskiskap. Í apríl í ár, tók Kaj Leo Holm JOhannesen, løgmaður so avgerð um, at garnakipið Anita skuldi missa rættin at fiska í føroyskum sjógvi til 31. august næsta ár.
Avgerðin hjá Løgmansskrivstovuni er nógv linari enn tilmælið frá Vørn, sum bað Løgmansskrivstovuna taka bæði veiðu- og fiskiloyvið frá Anitu med alla, og í mai segði Elmar Højgaard, stjóri í Vørn, at tað hevði verið rætt at tikið øll loyvi frá Anitu med alla.