Virus funnið í rognkelsi, ið skal avlúsa laksin

Íslendska matvørueftirlitið kunnger, at hetta er fyrstu ferð, at hetta virus er staðfest í fiski í Íslandi. Virusið er ikki skaðiligt fyri fólk. Virusið er funnið í rognkelsum, sum vórðu fiskað í Breiðafirði seint í summar.

Fyri knappliga ári síðani varð farið undir at útflyta yngul frá rognkelsum til eitt alibrúk í Føroyum. Men nú verður steðgað á, meðan alistøðin, har virusfongdu rognkelsini eru, verður sóttreinsað, upplýsir íslendska matvørueftirlitið.

Virusið funnið í umleið 80 fiskasløgum

Virusið, sum nú er funnið í Íslandi, er funnið í okkurt um 80 fiskasløgum um allan heimin, bæði í villum fiski og í aldum fiski.

Fyrstu ferð, virusið varð staðfest, var miðskeiðis í farnu øld. Í 1964 var virusið funnið í aldum ælabogasílum í Egtved í Danmark. Virusið fekk tí navnið Egtvedsjúka, men eitur annars VHS-virus.

Talan er um álvarsliga fiskasjúku. Fráboðanarskylda er um virusið, og tá tað er staðfest, verður allur smittaður fiskur tikin av og fyribeindur.