Oljuprísurin lækkar meir

Oljuprísurin lækkar aftur í morgun, at byrja við varð olja úr Norðsjónum seld fyri góðar 40 dollarar fyri tunnuna, men nú er líkt til, at prísurin er fallin til undir 40 dollarar fyri tunnuna, meir enn ein dollara minni enn seinnapartin í gjár.

Amerikanska skiferoljan verður seld fyri 38,3 dollarar fyri tunnuna, og tað er nakað minni enn í gjár. Tað er framvegis Saudiarabia sum selur nógva olju, tí landið ynskir at trýsta bíligu skiferoljuna hjá USA og Ruslandi av marknaðinum.

SÍ EISINI Ósemja fær oljuprísin at lækka

Tað er ríkiligt av olju á marknaðinum. Tí tosa serfrøðingar nú um, at oljuprísurin kann lækka niður í 32 til 34 dollarar fyri tunnuna, áðrenn londini verða noydd at seta tiltøk í verk, fyri at fáa prísin upp.

Lækkandi oljuprísurin kemur væl við hjá heimsbúskapinum, og tí fer lági oljuprísurin sum frálíður at betra um búskaparstøðuna í heiminum, siga serfrøðingar.