Annarhvør breti vil sleppa úr Evropasamveldinum

Bretar hava leingi verið misnøgdir við støðuna mótvegis ES. Undan parliamentsvalinum í mai, lovaði David Cameron, at varð hann afturvaldur, skuldu bretar sleppa á fólkaatkvøðu um bretska ES-limaskapin.

Eygleiðarar vænta, at bretar fara at atkvøða fyri at verða verandi í ES, men afturfyri fer Bretland at seta nýggj krøv um sín ES-limaskap. Tað eru hesi krøv, sum skulu viðgerast á fundinum í Brússel hósdagin.

SÍ EISINI - Hetta er ein tann týdningarmesta avgerðin

Bretski forsætisráðharrin ætlar millum annað at krevja, at so leingi pundið er gjaldoyra í Bretlandi, kann Bretland sleppa undan at veita evrulondunum, sum koma í fíggjarligt óføri. kreppulán.

Annarhvør breti heldur, at Bretland eigur at taka seg úr Evropasamveldinum, vísir ein nýggj spurnarkanning, sambært tíðindastovuni, Ritzau.

Ætlar at skerja almannaveitingar

David Cameron fer eisini at krevja, at ES-borgarar ikki kunnu fáa almannahjálp og skattafrádrátt, so skjótt teir flyta til Bretlands.

Sambært krøvunum, skulu allir ES-borgarar hava búð og arbeitt í Bretlandi í minst fýra ár, áðrenn teir fáa somu skatta- og vælferðarrættindi sum bretar.

Forsetin í Evroparáðnum, Donald Tusk, sigur seg vera til reiðar at finna semju við Bretland um ES-limaskap, men hann vil ikki gera viðmerkingar til krøvini hjá bretska forsætisráðharranum.