Útvarpslýsingar skulu hjálpa privatu miðlunum

Tey, sum keypa lýsingar í útvarpinum, stuðla útberingini hjá tíðindabløðunum og førleikamennigini hjá tíðindafólkum, er ætlanin hjá Mentamálaráðnum

Pengarnir, sum koma fyri lýsingar í Útvarpinum, skulu brúkast til at stuðla útberingini og førleikamenna starvsfólk hjá privatu miðlunum, ætlar Mentamálaráðið

Høgni Djurhuus

Bjarni Mohr

28.01.2016 - 18:21

Mentamálaráðið hevur sent uppskot um stuðul til tíðindamiðlar til hoyringar. Løgtingið hevur samtykt, at pengarnir, sum Kringvarpið fær fyri sjónvarpslýsingar, fara í filmsgrunn.

Pengarnir, sum koma fyri lýsingar í Útvarpinum, fara til at stuðla tíðindabløðunum at bera haldarum og sølustøðum bløðini og tíðindafólkum at styrkja seg fakliga og málsliga.

Nevnd skal býta út stuðulin

Ein Miðlastuðulsnevnd skal setast at avgera, hvør fær stuðul. Fimm fólk vera í nevndini. Felagið Føroysk miðlafólk tilnevnir tvey fólk í nevndina.

Føroya blaðútgevarafelag tilnevnir eitt, felagið Netmiðlan eitt og Fróðskaparsetrið tilnevnir eitt fólk, sum verður forkvinna ella formaður í nevndini.

Miðlastuðulsnevndin kann skipa fyri førleikamennandi tiltøkum fyri tíðindafólk. Ætlanin er, at stuðulslógin skal virka frá 1.januar í ár.