Ávara um ring koyrilíkindi

Koyrilíkindini eru stak ring ymsa staðni kring landið í morgun. Nógvur vátakavi kemur í løtuni niður, og tað rýkur eisini illa.

Í løtuni eru ferðslutrupulleikar á vegnum niðan móti Norðskálatunlinum og á Vestmannavegnum, sigur Bjarni Petersen, vakthavandi hjá Landsverki.

Tað er ikki bara við Norðskálatunnilin og á Vestmannavegnum, ring koyrilíkindi eru. Ring koyrilíkindi eru eisini á Oyndarfjarðarvegnum, sigur vakthavandi.

Rýkur skjótt í aftur

Við Norðskálatunnilin standa bilar fastir í morgun. Maskinur hjá Landsverki eru í løtuni á veg at grava vegastrekkið við tunnilin, upplýsir Landsverk.

- Koyrilíkindini eru ring, bilar standa fastir, men nú er glið við at koma á ferðsluna, segði ein bilførari á Vestmannavegnum, ið Góðan morgun Føroyar tosaði við.

Maskinur hjá Landsverki hava longu grivið vegastrekkini fyrr í morgun, men tað hevur kava so illa í morgun, at tað rýkur skjótt í aftur.