Uppmátingarnar til Eysturoyartunnilin byrjaðar

Umhvørvisstovan gjørdi í síðstu viku tær fyrstu uppmátingarnar til Eysturoyartunnilin. Uppmátingarnar verða grundarlag undir øllum øðrum uppmátingum tá tunnilin verður gjørdur.

Til samans hevur Umhvørvisstovan uppmátað seks fastapunkt til tunnilin - tvey við tunnilsmunnanar á Hvítanesi, Strondum og í Runavík, skrivar Umhvørvisstovan á heimasíðuni, us.fo

Tað hevur stóran týdning, at uppmátingarnar eru so neyvar sum til ber, tí tær verða grundarlag undir øðrum uppmátingum tá tunnilin skal gerast, sigur Umhvørvisstovan.

Nýggj tøkni tryggjar millimetur neyvleika

Tøknin, sum hevur verið brúkt til hinar tunlarnar í landinum, er ikki so neyv. Tí hevur Umhvørvisstovan valt at brúka nýggja tøkni, ið er neyv upp á millimeturin.

Hetta er fyrstu ferð í Føroyum, at uppmátingar til ein tunnil verða gjørdar við nýggju tøknini, har fýra ymiskir GPS'ar verða brúktir til hvørja uppmáting fyri at tryggja neyvleikan.

Umhvørvisstovan uppmátar bara sonevndu fastapunktini til Eysturoyartunnilin, meðan onnur taka sær av uppmátingini í tunlinum, tá tað arbeiðið einaferð byrjar.