Løggildu virkini stúra

Løggildu virkini stúra, nú ætlanin er at gera treytirnar lagaligari, so eisini onnur enn tey trý løggildu virkini, kunnu selja matvørur úr seyði og neytum.

Føroya arbeiðsgevarafelag hevur svarað Fólkaflokkinum, sum, eins og Vinnumálaráðið, hevur uppskot um broytingar í matvørulógini.

SÍ EISINI Bæði fyrimunir og vansar í broytingaruppskoti

Felagið sigur, at tær tríggjar fyritøkurnar, sum sambært matvørulógini frá 2010 hava brúkt nógvar pengar til at fáa løggilding til at gera matvørur, serliga úr seyði, stúra fyri framtíðini, verður matvørulógin nú liberaliserað.

Hesar fyritøkur óttast broytingarnar í matvørulógini og vænta, at møguleiki teirra at kappast minkar stórliga.

Ferðavinnan fegnast

Ferðavinnan er fegin um ætlaðu broytingarnar í matvørulógini, men hevur tó nógv fyrivarni.

Um minsta ivamál verður um sporføri á eini vøru, sum er gjørd heima við hús, verður torført at staðfesta ábyrgd.

Stórur vandi verður tá fyri, at trupulleikin endar hjá matstovuni, sum kann blíva stevnd eftir endurgjaldi. Ein annar spuringur er tá, um til ber at keypa trygging móti matvørum, sum ikki eru løggildar.