Hjúnabandslógin úr nevnd áðrenn summarferiuna

Uppskotið um at broyta hjúnabandslógina kemur úr Trivnaðarnevndini, áðrenn Løgtingið fer í summarfrí seinast í apríl. Tað ætlar Katrin Kallsberg, forkvinna í Trivnaðarnevndini.

Eftir at uppskotið hevði ligið í Trivnaðarnevndini síðan november mánaða, kom uppskotið til aðru viðgerð aftur í Løgtingum 16. mars. Men semja var ikki í samgonguni um uppskotið,

Serstakliga er tað tulkingarósemja um, hvørt samkynd, sum eru borgarliga vígd kunnu krevja eftir grein 14, stk. 2 í hjúnabandslógini, at verða signað í kirkjuni.

Kann fella burtur

Tískil endaði málið aftur í Trivnaðarnevndini. Kemur tað ikki úr nevndini aftur, áðrenn Løgtingið fer í feriu 25. apríl, so dettur málið burtur.

Men forkvinnan í Trivnaðarnevndini, Katrin Kallsberg, ætlar, at uppskotið skal koma úr nevndini, áðrenn tingið fer í summarfrí.

"Tað er heilt klárt mín vón og mín ætlan", sigur Katrin Kallsberg við Kringvarpið.