Hollendingar atkvøddu »nei«

Tá nærum allar atkvøðurnar vórðu taldar, varð greitt, at meiri enn 61 prosent hava atkvøtt ímóti. 38 prosent eru fyri.

Fólkaatkvøðan er ikki bindandi, men forsætisráðharrin, Mark Rutte, sigur, at tað ber ikki til at látast sum einki, tá úrslitið er so greitt.

30 prosent av øllum teimum, sum høvdu valrætt, skuldu velja í gjár fyri at fólkaatkvøðan skulu hava gildi. Valluttøkan endaði á 32 prosentum.

Einasta landið, ið hevur atkvøtt »nei«

Holland er sostatt tað einasta av teimum tilsamans 28 limalondunum í ES, sum ikki hevur góðkent avtaluna, sum skal knýta Ukraina tættari at ES.

Ein møguleiki er, at tað verður skrivað í sjálva avtaluna, at Holland ikki tekur undir við henni, men í løtuni er ógreitt, um tað ber til, skrivar Reuters.

Mark Rutte, forsætisráðharri, fer nú at viðgera støðuna bæði í hollendska tinginum og við hini ES-londini.