Samgongan varðveitir meirilutan

Samgongan varðveitir meirilutan, og Sambandsflokkurin og Fólkaflokkurin fáa ein tingsess aftrat í part, sum teir taka frá Nýggjum Sjálvstýri og Miðflokkinum.

Tað vísir fyrsta veljarakanningin síðani løgtingsvalið 1. sepember, sum Gallup hevur gjørt fyri Kringvarpið og Miðlahúsið.

Kanningin vísir, at Javnaðarflokkurin, Tjóðveldi og Framsókn varðveita sínar tilsamans 17 tingsessir.

Javnaðarflokkurin størstu afturgongdina

Javnaðarflokkurin hevur størstu afturgongdina í kanningini, 1,3 prosentstig, og fer niður í 23,8 prosent, men varðveitir sínar 8 tingsessir. 

Tjóðveldi hevur ein lítla framgongd, 0,3 prosentstig, og fær tilsamans 21 prosent. Hann varðveitir sínar 7 tingsessir.

Framsókn hevur 0,8 prosentstig í afturgongd, og fer niður í 6,1 prosent, men varðveitir báðar sínar tingsessir.

Sambandsflokkurin størstu framgongdina

Sambært kanningini hevur Sambandsflokkurin størstu framgongdina, 2,3 prosentstig, og hann hevði fingið 21 prosent, var val nú.

Sambandsflokkurin fær ein tingsess aftrat, og hevði fingið sjey tingsessir.

Fólkaflokkurin hevur eisini framgongd, 0,8 prosentstig, og hevði fingið 19,7 prosent, var val nú. Eisini Fólkaflokkurin fær ein tingsess aftrat, og hevði havt sjey, var val nú.

Miðflokkurin missir sambært kanningini 1,2 prosentstig, og fer niður í 4,3 prosent, og missir annan tingsessin.

Nýtt Sjálvstýri missir 0,1 prosent, niður í 3,9 prosent, og hevði eisini mist annan tingsessin. 

527 spurd í kanningini

Tingsessirnir, sum Miðflokkurin og Nýtt Sjálvstýri missa, fara til Sambandsflokkin og Fólkaflokkin. 

527 fólk vórðu spurd í kanningini, sum Gallup gjørdi fyri Kringvarpið og Miðlahúsið.