- Tíðindi, mentan og ítróttur
Lendi til flogvøllin: Munurin er 20 mió. kr.
![](https://kvf.fo/sites/default/files/styles/grein-ovasta-mynd/public/vaga_floghavn_1.jpg?itok=d2vPTKN7)
Gjógvin millum Vinnumálaráðið og hagan við flogvøllin er góðar 20 milliónir krónur.
Verður niðurstøðan í landsrættinum fermetrar, er prisurin eftir at taka støðu til, 27 krónur ella 71 krónur:
Krøvini hjá báðum pørtum vera tey somu sum í Føroya rætti, tá Vinnumálaráðið og hagaparturin Ytri Suttringur í Sørvági hittast í Eystara landsrætti tann 7.juni.
Vinnumálaráðið skeyt dómin hjá Føroya rætti inn fyri Landsrættin, og hagaparturin mótappelleraði.
Stríðið er um lendið, sum í 2009 varð ognartikið til flogvøllin.
10,6 mió. kr.
Í dómi tann 31.mars í 2014 segði Føroya rættur, at teir, sum eiga hagapartin Ytri Suttring, eiga at fáa 10,6 mió. kr. í endurgjaldi frá Vinnumálaráðnum. Við rentum og øðrum eiga hagaeigararnir 12,3 mió. kr.
Endurgjaldið er fyri mist lendi og fyri grótið, sum varð tikið til at leingja flogvøllin.
At byrja við var kravið um endurgjald dupult so stórt. Men Vinnumálaráðið vildi bara lata góðar 340.000 kr.
Vinnumálaráðið heldur uppá, at gerast skal upp í gyllin og ikki í fermetrum.
Fult viðhald
Hagaparturin fekk fult viðhald, góðar seks milliónir krónur, viðvíkjandi grótinum, sum varð tikið til flogvøllin. Og hann fekk 27 krónur fyri fermeturin av ognartikna lendinum. Metingarmenn, sum rætturin tilnevndi, komu við tí talinum.
Yvirmetingarnevndin segði 71 krónur fyri fermeturin, tí talan er um jørð millum tvær stórar bygdir. Og ta metingina brúkti hagaparturin, tá hann stevndi.
Upprunaliga kravið var 23 mió. kr., men tað varð lækkað niður í 20,6 milliónir, tá málið varð viðgjørt í Føroya rætti.
Og Vinnumálaráðið heldur ikki, at hagaparturin eigur nakað endurgjald fyri grótið, millum annað tí hagin eigur framvegis lendið, har sum grótið varð tikið.
Hóast Vinnumálaráðið er mótpartur hjá hagapartinum í rættinum, skal P/f Vága Floghavn rinda Vinnumálaráðnum tað, sum endaligi dómurin sigur.