Óvist nær søkt verður aftur

Hóast aðalstjórastarvið í Uttanríkis- og vinnumálaráðnum skuldi lýsast leyst sum skjótast, sambært Løgmansskrivstovuni, so er starvið ikki lýst leyst enn.

Tað er ikki greitt um starvið verður lýst leyst fyri summarfrítíðina. Marjun Hanusardóttir, løgmansstjóri, sigur, at enn er ikki avgjørt, nær starvið verður lýst leyst.

SÍ EISINI Politiskar starvssetanir undirgrava rættartrygdina

Marjun Hanusardóttir veit ikki at siga í dag, um starvið verður lýst leyst fyri summarfrítíðina. 3. juni gjørdi løgmaður av, at starvið skuldi lýsast leyst av nýggjum.

Tá boðaði løgmansskrivstovan frá, at starvið fór at verða lýst leyst, sum skjótast. Men nú, góðar tríggjar vikur seinni, er starvið ikki lýst leyst.

Til samans tíggju umsóknir vóru til starvið, tvey fólk vóru innstillað, og av teimum var John Rajani innstillaður, sum nummar eitt.

SÍ EISINI Sí øll 33 punktini: Hetta kærir John Rajani um

Men Poul Michelsen, landsstýrismaður, vildi ikki hava John Rajani, sum aðalstjóra, tí hann metti hann vera ógegnigan á ali-,tele- og bankaøkinum.

Tí gjørdi løgmaður av, at starvið skuldi lýsast leyst av nýggjum. John Rajani hevur kært løgmann og landsstýrismanni í Vinnu- og uttanríkismálinum til løgtingsins umboðsmann fyri handfaringina av málinum.

Men John Rajani tók ikki starvsumsókn sína aftur til aðalstjórastarvið í Uttanríkis- og vinnumálaráðnum. Tí verður hansara umsókn til starvið liggjandi.