- Tíðindi, mentan og ítróttur
Fjarhitin longu umrøddur í 2013
![](https://kvf.fo/sites/default/files/styles/grein-ovasta-mynd/public/20160626_093239.jpg?itok=BTXPQEJW)
Sambært sáttmálanum, sum Landsverk tó ongantíð undirskrivaði, ætlaði Fjarhitafelagið í seinasta lagi nýggjársftan í 2015 at hava lagt fjarhitarørini út í Marknagil.
Í uppskotinum um sáttmála stendur síðani: "verður tá settur hitavekslari saman við orkumátara upp, og verður tí fjarhiti at veita Skúlaheiminum, Handilsskúlanum/Marknagilsdeplinum samsvarandi serligari avtalu, sum partarnir skulu semjast um."
Íbindingin skuldi ikki kosta landinum nakað. Men afturfyri skuldi Fjarhitafelagið fáa oljufýringina í Skúlaheiminum fyri einki. Sáttmálin millum Fjarhitafelagið og Landsverk skuldi í fyrsta lagi kunna sigast upp í 2035.
SÍ EISINI Stríð um hitan til Glasir
Landsverk svaraði sama dagin, tann 29. apríl 2013, at tað vildi hava meira at vita um kostnaðin næstu 10-15 árini, og um avrokning. Fjarhitafelagið svarar 8. juni í 2013, at prísurin er 72 oyru fyri kilowatttíman, og tá er meirvirðisgjaldið við.
Hesin prísur verður galdandi í tíggju ár. Hann kann tó stillast eftir seks árum. Treytin er tó, at øll orkan, sum Marknagilsdepilin brúkar, er frá Fjarhitafelagnum.
Aðrar treytir eru, at Fjarhitafelagið sleppur i gongd við at byggja hitamiðstøðina í Marknagili, at fígging fæst til at útbyggja fjarhitanetið, og at neyðug loyvi fáast til útbyggingina.
Tóku ikki av tilboði
Sambært teimum skjølum, Útvarpið hevur, tykist málið at stegða har. Landsverk tók ikki av tilboðnum frá Fjarhitafelagnum.
Sáttmálauppskotið um fjarhita var ikki lagt við, tá Rigmor Dam, landsstýriskvinna, í síðstu viku bað Løgtingið um 13,4 milliónir krónur til jarðhita til Glasir.
Fjarhitafelagið sendi eisini Landsverki uppskot um sáttmála um fjarhita til Landssjúkrahúsið tann 29. apríl í 2013.