Skipanin við fiskidøgum í søguna

Fiskidagaskipanin hevur síðstu 20 árini verið brúkt til at stýra fiskiskapinum eftir botnfiski undir Føroyum, og einaferð varð hon skird at vera heimsins besta skipan.

Men meirilutin í nýskipanarnevndini hjá Fiskimálaráðnum metir ikki, at fiskidagaskipanin, saman við øðrum átøkum og reguleringum, hevur megnað at tryggja góða stovnsrøkt og stuðla uppundir lívfrøðiliga burðardyggan fiskiskap.

Kvotuskipan setast í verk heldur

Meirilutin í nýskipanarnevndini metir eisini, at fiskidagaskipanin er ov stirvin til at birta undir tillagingar og effektiviseringa í flotanum og harvið ein búskaparliga burðardyggan fiskiskap. 

Meirilutin í nýskipanarnevndin mælir tí til at skifta fiskidagaskipanina út við eina kvotuskipan.

Nevndin ásannar, at ein vansi við eini kvotuskipan kann vera, at fiskur verður blakaður út, ella verður landaður undir følskum heiti fyri at halda eina ásetta kvotu. Vandi fyri, at bert tann veiða, sum gevur besta avreiðingarprísin, verður tikin til lands, ásannar nýskipanarnevndin. 

Øll veiða førast til lands

Kortini metir meirilutin, at hetta eru vansar, sum til ber at basa við ásetingum av ymsum slag. Eitt nú við at áseta, at øll veiða skal førast til lands. 

Líka síðani fiskidagaskipanin kom í gildi hevur landsstýrismaðurin í fiskivinnumálum hvørt ár á ólavsøku borið eitt lógaruppskot um ásetingar av fiskidøgum í Løgtingið, sum síðani hevur ásett fiskidagarnar fyri komandi fiskiár.

Tað skal eisini broytast, heldur meirilutin í nýskipanarnevndini. Í staðin skal landsstýrismaðurin einsamællur fáa lógarheimild til at áseta eina hámarksveiðu í fiskiskapinum eftir botnfiski í føroyskum sjógvi.

Óvist hvør umboðar meirilutan

Hámarksveiðan skal tó ásetast innan fyri karmarnar og treytirnar í eini umsitingarætlan, sum er kjølfest politiskt.

Nýskipanarnevndin hevur fingið sum politiskan setning at arbeiða eftir, at alt fiskiríkidømið skal seljast um uppboðssølu. Søgulig rættindi skulu ikki longur vera galdandi.

Í hoyringsskrivinum, sum er sent undan fundum í næstu viku, verður einki sagt um, hvussu stórur meirilutin í nýskipanarnevndini er, ella hvør umboðar meirilutan.