Umhugsar at fara upp í málið um starvssetan

Sambært umboðsmannalógini kann umboðsmaðurin sjálvur taka mál til viðgerðar og gera neyðugar kanningar í hesum sambandi, og tað er tað, Sólja í Ólavsstovu ger í hesum føri.

Í Degi og Viku 12. september varð Turid Arge, aðalstjóri í Heilsu- og innlendismálaráðnum, endurgivin fyri at siga, at einki er skjalfest í sambandi við at flyta Anni á Hædd í starvið á Umhvørvisstovuni.

Samráddust um starvsflyting

Avgerðin varð ikki tikin í Heilsu- og innlendismálaráðnum. Tað vóru sakførararnir hjá pørtunum, sum samráddust, og gjørdu avtaluna og tóku avgerðina um at seta Anni á Hædd í nýtt starv.

Eftir tíðindini í Degi og Viku bað umboðsmaðurin Heilsu- og innlendismálaráðið um at greiða frá, um aðalstjórin er rætt endurgivin, og hví einki er at finna í skjalayvirlitinum í málinum um at flyta deildarstjóran í annað starv.

Umboðsmaðurin ger vart við í skrivinum til Heilsu- og innlendismálaráðið, at tað er ein fyrisitingarlig avgerð at flyta starvsfólk í annað starv, og at ein myndugleiki ikki uttan lógarheimild kann lata hesa heimild til onnur.