Innflutningurin vaksin

Vinnulívið hevur innflutt munandi meir av maskinum og amboðum í ár. Vøksturin er 169 milliónir krónur, ella heili 45 prosent.

Serliga er vøksturin stórur av ymiskum maskinum til frysting, køling og flutning, skrivar Hagstova Føroya á heimasíðuni.

Meira byggitilfar innflutt

Innflutningur av tilfari til vinnulívið, bæði til byggivinnuna og aðra vinnu, er eisini vaksin hesar mánaðirnar - millum níggju og 14 prosent.

Av vørum, sum eru til beinleiðis húsarhaldsnýtslu, er innflutningurin vaksin fimm prosent. Vøkstur er í mestsum øllum bólkum av húsarhaldsvørum.

Bíliga brennievnið sæst eisini væl í tølunum. Hóast vit hava innflutt umleið somu nøgd sum í fjør, kostaði brennievnið 159 milliónir krónur minni.