Fimm flokkar samráðast í Íslandi

Tingbólkarnir hjá teimum fimm flokkunum í Íslandi, sum royna at skipa stjórn, viðgera nú samgongusamráðingarnar eftr fundin millum floksleiðslurnar í dag.

Katrin Jakobsdóttir, forkvinna hjá teimum Vinstru grønu, stendur fyri samráðingunum. Hon fekk heimildina frá forsetanum mikudagin.

Hon væntar at frætta frá hinum flokkunum longu í kvøld. Katrin Jakobsdóttir sigur við íslendskar miðlar, at hon er bæði bjartskygd og realistisk.

Møgulig stjórn greiðan meiriluta

Í andstøðu vera gomlu stjórnarflokkarnir, Sjalvstæðisflokkurin, sum er nógv størsti flokkur í Íslandi, og Framsóknarflokkurin, sum hevði forsætisráðharran í undanfarnu stjórn, við 29 tinglimum.  

Teir fimm flokkarnir, sum nú royna at skipa stjórn, eru umframt tey Vinstru grønu Piratarnir, Viðreisn, Bjørt framtíð og Samfylkingin.

Verður stjórnin skipað hevur hon 34 av 63 altingslimum. Í kvøld verður væntandi greitt, um farast kann undir realitetssamráðingar. Ætlanin er, um so verður, at gera skjótt av.