Íslendingar vilja hjálpa

Íslendingar eiga at hjálpa føroyingum eftir ódnirnar her á jólum, halda føroyavinir í Íslandi. Mælt verður til at gera eina landsinnsavning

Føroyavinir í Íslandi hava sent forsetanum, ráðharrum og altingsfólkum áheitan um at hjálpa føroyingum eftir jólaódnina

Mynd: Lesaramynd: Regin Thomsen

Høgni Djurhuus

Bjarni Mohr

29.12.2016 - 12:20

Føroyavinir hava sent bræv til íslendska forsetan, ráðharrarnar og altingsfólkini og biðið tey stuðla føroyingum við pengum, nú so nógvur skaði er hendur í Føroyum.

Føroyingar hava so ofta stuðlað íslendingum við pengum eftir náttúruvanlukkur so sum eldgosið í Vestmannaoyggjunum og skalvalopini á Flateyri og í Súðavík.

SÍ EISINI #JOLAODN16: Her eru lesaramyndirnar

Føroyingar vóru eisini tey fyrstu at læna íslendingum pengar eftir búskaparliga skrædlið í Íslandi 2008.

Tey, sum nú hava heitt á politisku myndugleikarnar í Íslandi, eru tey somu, sum í 2014 stovnaðu facebookbólkin "Vit biðja um umbering" eftir at føroyski trolarin Næraberg ongar tænastur ella hjalp fekk í havnini í Reykjavík.

Nógvar viðmerkingar eru á Facebook um jólaveðrið í Føroyum. Mælt verður til at gera eina landsinnsavning í Íslandi til frama fyri føroyingar.