Siga »nei« til hjálp: Nú øsa fólk seg

"Álvaratos! Takið ímóti hasi útstrektu hondini frá íslendingum. Gevið teimum ein kjans at hjálpa føroyingum." "Eg haldi, hetta er langt úti."

Landsstýrismaðurin er fyri atfinningum á Facebook, eftir at hann hevur svarað íslendingum, at Føroyar ikki hava brúk fyri hjálp eftir oyðileggjandi ódnirnar á jólum.

Meðan íslendingar í løtuni savna pening inn til føroyingar, er ikki vist, at almennu Føroyar fara at taka ímóti peninginum. Tað hevur Poul Michelsen gjørt greitt.

SÍ EISINI Siga »nei« til hjálp

Men tað fellur ikki í góða jørð, at landsstýrismaðurin ikki tekur ímóti peninginum, sum verður savnaður inn í Íslandi. Nógv fólk øsa seg á facebooksíðuni hjá KvF.

"Eg haldi, at Poul skuldi heldur verið takksamur og víst annan hugburð móti íslendingum," sigur ein av teimum, ið hevur sagt sína hugsan á tráðnum niðanfyri.

Greinin heldur fram niðanfyri

Meðan tey flestu øsa seg um, at landstýrismaðurin ikki hevur ætlanir um at taka ímóti innsavnaða peninginum vegna almennu Føroyar, eru eisini onnur, sum halda tað øvugta.

"Nakrar ódnir, sum vit eru væl fyrireikað at taka ímóti, er ikki nøkur vanlukka fyri okkara samfelag. Haldi, at teir áttu at goymt hasar pengarnar til okkurt meiri álvarsligt hendi."

Fleiri lesarar halda, at føroyingar kunnu taka ímóti peninginum frá íslendingum, og býta peningin millum tey ymisku bjargingarfeløgini, sum eru í Føroyum.